Երևանում կայացավ հայ-ռուսական առողջապահական առաջին համաժողովը. Հայաստանում էր ՌԴ ԱՆ Վերոնիկա Սկվորցովան

Նոյեմբերի 7-ին Երևանում կայացավ հայ-ռուսական առողջապահության առաջին համաժողովը, որին մասնակցելու նպատակով Հայաստան էր ժամանել ՌԴ առողջապահության նախարար Վերոնիկա Սկվորցովայի գլխավորած պատվիրակությունը: Պատվիրակության կազմում էին բժշկագիտության տարբեր ոլորտները ներկայացնող անվանի պրոֆեսորներ, պրակտիկ բժիշկներ:

Համաժողովի մեկնարկը տրվեց Մեսրոպ Մաշտոցի անվան հին ձեռագրերի գիտահետազոտական ինստիտուտ-թանգարանի նոր մասնաշենքի նիստերի դահլիճում:

Համաժողովի ընթացքում երկու երկրի առողջապահության նախարարների միջև ստորագրվեց դեղերի շրջանառության, բժշկական սարքավորումների և կենսաակտիվ հավելումների, շարունակական բժշկական զարգացման, ինչպես նաև առողջապահական համակարգի միջև տեղեկատվության ապահովման, էլեկտրոնային առողջապահության և հեռաբժշկության ոլորտներում փոխըմբռնման երեք հուշագիր: ՌԴ և ՀՀ ազգային բժշկական պալատները և Հայաստանի առողջապահության կազմակերպիչների ասոցիացիան ստորագրեցին համագործակցության մասին պայմանագիր:

Համաժողովի բացմանը հաջորդող պլենար նիստերում Հայաստանի և Ռուսաստանի առաջատար մասնագետները քննարկել են մոր և մանկան առողջության խնդիրներին, դեղերի շրջանառությանը, առողջապահական բարեփոխումներին, բժշկական շարունակական զարգացման հեռանկարներին, տեղեկատվական տեխնոլոգիաներին, հանրային առողջապահությանը, ոչ վարակիչ հիվանդությունների դեմ պայքարին, էլեկտրոնային առողջապահությանը, ֆինանսական մեխանիզմներին վերաբերող մի շարք հարցեր:

Առողջապահության ոլորտի ներկայացուցիչները անդրադարձել են բժշկական օգնության և ծառայությունների որակին, հասանելիության բարձրացման ապահովմանը:

ՌԴ առողջապահության նախարար Վերոնիկա Սկվորցովայի գլխավորած պատվիրակությունը՝ ՀՀ առողջապահության նախարար Արմեն Մուրադյանի ուղեկցությամբ, այցելել է Մ. Հերացու անվան պետական բժշկական համալսարանի «Հերացի» թիվ 1 համալսարանական հիվանդանոցի նյարդավիրաբուժության և գլխուղեղի կաթվածների բուժման մասնագիտացված կենտրոն: Տեսակի մեջ եզակի տարածաշրջանային կենտրոն այցելությունը նպատակային է եղել. Վ. Սկվորցովան նեղ մասնագիտությամբ նյարդաբան է: Այս ոլորտի զարգացումը նրա մշտական ուշադրության կենտրոնում է: Անվանի նյարդաբանը հսկայական ներդրում ունի Ռուսաստանում գլխուղեղի կաթվածի դեմ պայքարի գործում: Նա մեծ ցանկություն է ունեցել ծանոթանալու գլխուղեղի կաթվածների բուժման հայաստանյան մասնագիտացված կենտրոնի պայմաններին:  Մ. Հերացու անվան պետական բժշկական համալսարանի «Հերացի» թիվ 1 համալսարանական հիվանդանոցի նյարդավիրաբուժության և գլխուղեղի կաթվածների բուժման մասնագիտացված կենտրոնի պայմանները գոհացրել են տիկին Սկվորցովային:

ՌԴ ԱՆ նախարար Վերոնիկա Սկվորցովա.

–   Տպավորությունս, միանշանակ, լավ է: Ակնհայտ է, որ կենտրոնը զարգացում է ապրում: Այն համապատասխանում է ժամանակի պահանջներին, ունի հիվանդի ճիշտ տեղափոխություն իրականացնելու, արագ ախտորոշելու և հետազոտելու բոլոր հնարավորությունները, այդ թվում նաև՝ համակարգչային և մագնիսա-ռեզոնանսային տոմոգրաֆիաների: Կենտրոնում ստեղծված են բոլոր հնարավորությունները անհետաձգելի բուժում իրականացնելու համար: ՀՀ ԱՆ նախարար Արմեն Մուրադյանից տեղեկացա, որ Հայաստանում պատրաստվում են կյանքի կոչել անոթային կաթվածների ծրագիրը, ինչի շնորհիվ հնարավոր կլինի կանխել անոթային պաթոլոգիաները, որոնք բոլոր ժողովուրդների մոտ մահվան հիմնական պատճառներից են:

ՀՀ ԱՆ նախարար Արմեն Մուրադյան. «Կենտրոններ պետք է լինեն ո՛չ միայն Երևանում, այլև մարզերում».

–   Հաշվի առնելով, որ ընդհանուր մահացության 80 տոկոսը պայմանավորված է 4 հիվանդություններով, որից 48 տոկոսը՝ սրտանոթային համակարգի, ուստի մեզ համար սա գերակա ուղղություն է՝ մահացությունը նվազեցնելու համար: Այս ոլորտում կենտրոններ պետք է լինեն ո՛չ միայն Երևանում, այլև՝ մարզերում:  Հասանելի լինելու համար մենք պետք է կարողանանք պետական ծրագրերով ապահովել մատչելիություն: Խոսելով որակի մասին, տիկին Սկվորցովան նշեց, որ մենք  փորձում ենք աշխատանքներն իրականացնել միջազգային արձանագրություններով՝ հիվանդի ընդունելության պահից մինչև ապաքինումը և վերականգնողական միջամտությունները:

Նույն օրը Երևանի Մ. Հերացու անվան պետական բժշկական համալսարանում՝ ռեկտոր Միքայել Նարիմանյանի մասնակցությամբ, քննարկվեցին համագործակցության հետագա ծրագրերը:

Բժշկական համալսարանի վարչական մասնաշենքի նիստերի դահլիճում տեղի ունեցավ մանկական արյունաբանական խնդիրներին նվիրված միջոցառում, որին ներկա են գտնվել նաև ՀՀ առաջին տիկին Ռիտա Սարգսյանը,  ՀՀ ԱԺ առողջապահության, մայրության և մանկության հարցերի մշտական հանձնաժողովի նախագահ Արա Բաբլոյանը և ՌԴ ազգային բժշկական պալատ նախագահ, «աշխարհի մանկական բժիշկ», պրոֆեսոր Լեոնիդ Ռոշալը: Նրանք հանդես են եկել ելույթներով:

Առողջապահական համակարգում արդյունավետ համագործակցության, Հայաստանի և Ռուսաստանի միջև համագործակցության սերտացման գործում ունեցած մեծ ավանդի համար ՌԴ ԱՆ Վերոնիկա Սկվորցովան պարգևատրվել է ՀՀ ԱՆ հուշամեդալով:

Նշենք, որ համաժողովը կազմակերպել էին ՀՀ և ՌԴ առողջապահության նախարարությունները, Ռուսաստանում ՀՀ և Հայաստանում ՌԴ դեսպանատները:

Հարցեր, պատասխաններ, մեկնաբանություններ